مافيش بنت قاسية

مفيش بنت قاسية , مفيش بنت جبروت , مفيش بنت قوية مهما ادعت دا , البنات بتستخبي ورا قوتها من الناس , بتخبي ضعفها عشان محدش يستغله ضدها .. من كُتر خوفها بتستقوي , من كُتر ما هما شايفين اللي بيحصل حواليهم بيقفلوا على روحهم وقلبهم .. مرعوبين من الوجع , مش سهل حد يدخل قلبهم و لو دخل بيبقي مُميت إنه يطلع , بيبقي عامل زي الوشم بيتشال بماية نار و بيحرق فيهم و بيسيب ندوب ما بتتمحي بالزمن و لا بيروح في طي النسيان .. لو لقيت بنت كدا متحاولش تدخل حياتها غير و انت واثق إنك هتكمل ف حياتها لإن هيكون صعب إنها تنساك رغم إنها هتحسسك إنك و لا أي حاجة و لا فارق معاها , متحاولش تكسر حواجزها و تتخطاهم بهدوء و ذكاء محارب و تدوس علي الغام قلبها و تفضل ثابت مكانك و متحسسهاش إنك هتكمل , متتعمقش في قلبها و روحها عشان هتكسرها و مش هتطيب , يعني متتحملش عناء الرحلة جواها لهدف إنك توصل بس , لو هتتعب عشان توصل و تحس بإنتصار إنك وصلت و حطيت عّلمك علي مكان لم يمسه بشر قبلك و اعلنت احتلالك لقلبها يبقي بلاش , أبعد .. لإن هي البنت الوحيدة اللي هتندم في يوم إنك خسرتها و لو حاولت ترجع بدل السنة ألف مش هترجع و لا هتنول حتي نظرة من عنيها , لإن هي لما بترمي حاجة وراها مش هترجعلها و لو هتموت عليها .