قصيـــدة ،،(( غنــــــى )) ..شعـــر / كرم فارس  

قصيـــده ،،،(( غنــــــى ))،،،

شعـــر / كرم فارس

رسمتك على كفى
بالورد والمسك والحنه
ودعيت من ربنا يديكى
من روحى
ومن دمى
…..
فوق السحاب طيرى
يا عصفوره من الجنه
أشدى ورتلى غناويكى
شرقى .. غربى
ولا تبعديش عنى
…..
حبك شريانى .. هو نبضى
قلبك عنوانى .. عاشق لحضنه
بحلم أكون أجمل ما فيكى
يا حلم وردى
يا أغلى ما عندى
…..
وغنى .. غنى برضايه
أو حتى غصب عنى
يا ساكنه الفؤاد
ومرسومه فى الننى
غنى .. غنى
**********
أملى الفضا والكون
شعر وأغانى
…..
أنا كنت فى حالة جنون
لما منعتك تغنى
….
كان فين قلبى الحنون
وأنتى بتموتى منى
…..
أنا فى غيرتى شيطان ملعون
أغفرى ليه ولو قدرتى سامحينى
….
حياتى من غيرك شجن وسكون
عودى للحياه ولو عفوتى رجعينى
…..
حبك طريقى ونورك ضى العيون
وعلى قد ما تقدرى
غنى .. غنى
************
أنا ولا كان أبدآ
فى نيتى أخرسك
أو من جروحك تعانى
…..

عاشق ملامحك
ولو أنتى أحلام
أحبك تمنى
…..
محتاج لحبك
مشتاق لحضنك
ولا عليه ملام
لو أترجيتك تحنى
وغنى .. غنى
************
أنا حاسك
أنك ضعيفه
مش حمل أنا تأنيب الضمير
كونى حره بس أسمعينى
…
أنا بحبك
وأنتى عارفه
مش محتاجه منى تفسير
حساها من حنينى
…
أنا عاشقك
وأنتى خايفه
يموت الحب ويضيع المصير
بس قبل ما تودعينى
…
خدى من عمرى وأمضى
كل اللى باقى من سنينى
ومن شريانى أنزعى نبضى
ماتسبيش نبضه لأنينى
مش هاسمحلك أنك تموتى
بين كفوفى وتعذبينى
أموت أنا وأنتى تعيشى
ووصيتى ليكى أنك تغنى
….
غنى .. غنى برضايه
أو حتى غصب عنى
يا ساكنه الفؤاد
ومرسومه فى الننى
غنى .. غنى .. غنى