نصائح تهمك يا سيدتى لجمالك وحياتك بصفة عامه مع خبيرة التجميل عبير وليد !

كتب : حمدى محمد

نصائح مهمة لجمالك وحياتك عموماً:
اتعودي تهتمي ببشرتك من سن ال ٢٥ اهتمي بعمل الماسكات الطبيعية
علي الأقل مرتين ف الأسبوع بعد ما تخلصي الماسك مرري قطعة تلج علي الوجه كله ..
التلج بيشد الجلد و بيمنع التجاعيد وبيقفل المسام بعدها رطبي بشرتك بكريم مرطب
كويس مش لازم يكون غالي اوي ممكن يكون سعره مناسب

2-استخدمي كريم ليل مقاوم التجاعيد ومحفز لإنتاج الكولاجين ( النوم نامي كويس جداً جداً النوم الكافي بيأخر ظهور التجاعيد ويقاوم التصبغات والتقدم ف السن و خطوط تحت العينين والهالات السودة هيتم ذكرها ف post خاص

3- أعرفي نوع بشرتك الاول دهنية / عادية / مختلطة / جافة واعملي جلسة فراكشنال ليزر لبشرتك كل ٣ شهور ولو عديتي ال ٣٥ اعملي جلسات بلازما اللي بتأخر التجاعيد بشكل ملحوظ جداً

4- اوعي تنامي بالمكياج نهائياً لانه بيقفل المسام وبيمنع الوجه انه يتنفس وبالتالي بيحصل جفاف وتشققات اللي بتسرع التجاعيد والخطوط الرفيعة

5- اهتمي بالرقبة والكفين واستخدمي للرقبة نفس كريمات الوجه وللكفين كريم مرطب مناسب .. الرقبة والكفين من أسرع الحاجات اللي بتعجز بسرعة وتظهر التقدم ف العمر، استخدمي واقي شمس التعرض المباشر للشمس بيخليها جافة ومش متوازنة ومش صحية أبداً وخصوصاً ع الشواطيء جددي الكريم كل ٢٠ دقيقة … لو نازلة الصبح استخدمي font de tant محمي ب ١٥ فيما فوق ،،،

6- اشربي مياه كتير جداً وعصائر طبيعية عشان تحافظي ع نضارة جلدك وبشرتك عموماً … اشربي أعشاب وخلصي جسمك من السموم

7- اتجنبي التدخين ولو بتدخني بطلي فوراً التدخين بيعجز الوجه بسرعة جداً والمسبب الرئيسي للتجاعيد اللي بتظهر حول الفم وبسبب زرقان الشفاه وتشققهها ده غير اصفرار الأسنان بشكل واضح وملحوظ وابعدي تماماً عن الjunk food والوجبات السريعة والمقلية بتزود الوزن جداً ومش بتفيدك نهائياً ولو نفسك فيها اوي تبقي مرة في الشهر

8- اتمشي كتير كتير كتير المشي من افضل الرياضات اللي بتحرك كل الجسم وبتحافظ ع ثبات الوزن وبتشد الجسم كله ساعة كل يوم او ٤ مرات ف الأسبوع

9- كلي اي حاجة خضراء وسلطة كتير بقدونس خس جرجير خيار بروكلي اي خضروات ..

10- اهتمي بالبروتين عشان صحة شعرك البيض اللحوم البيضاء والحمراء الألبان والخبز الأسمر وأشتري فيتامينات خاصة بالشعر والأظافر والبشرة وموجودة ومتداولة كتير في الصيدليات

11- اي مشكلة تظهر ف جسمك او بشرتك او شعرك او إسنانك حليها فوراً اوعي تتغاضي عن اي مشكلة تظهر مجرد التغاضي والتعود ع التعامل مع المشكلة او التعود عليها هتخليها تكبر وتدخل ع مشكلة اكبر.

12- ابعدي تماماً عن المكياج الصيني او الرخيص اشتري ماركات بأسعار مناسبة ومش شرط تكون غالية اوي

13 -استمتعي بكل لحظة ف حياتك وافرحي باي حاجة مهما كانت صغيرة

14- عيشي حياتك وابعدي عن الطاقات السلبية قدر الإمكان وعن الشخصيات المهمومة دايماً او الشكاية واللي دايماً تعقدك او تخوفك

15- روحي أماكن مفتوحة متصلة بالطبيعة وابعدي عّن الاماكن المقفولة كل ما اتصلتي بالطبيعة كل ما هتكوني اسعد المعروف ان التواصل مع الطبيعة ف الاماكن المفتوحة بيحسن الحالة النفسية جداً لان سريان الطاقات الإيجابية فيها أوسع و الطاقات الإيجابية فيها عالية

16- لو ف البيت نضفيه من الكراكيب والحاجات الملهاش لزمة لان ده بيعوق سريان الشحنات الإيجابية ف بيتك او غرفتك وبيزودك بشحنات سلبية بترفع عندك درجات التوتر العصبي

17- متدخليش اي نقاشات خسرانة لمجرد انك تظهري نفسك او وجهة نظرك غالباً النقاشات دي بتنتهي بتوتر عصبي شديد و ارتفاع ضغط الدم وتذكري المقولة المعروفة lose the argument for keeping the peace او اخسر الجدال لكي تحتفظ لنفسك ببعض السلام

18- متتكلميش عن نفسك عشان اي حاجة وافتكري ان الانسان الكويس مش محتاج يتكلم عن نفسه أبدا ً ولكن الناس بتعرفه بالمواقف من خلال التعامل معاه .

19- الرقي مش بالفلوس الكتير ولا الغني الأوفر الرقي بتقبل الاخر وتقبل قرارته واستيعاب وجهات نظره والاختلاف معاه برقي دون الفاظ جارحة او صوت عالي

20- اهتمي بأصغر التفاصيل ف حياتك و فكري ازاي تتطوري ف كل شيء وتبقي احسن وحافظي ع صلتك بربنا …
21 – لو قربتي ع ال٣٠ او عدتيهاومتجوزتيش مش كارثة خالص ع فكرة ال٣٠ مش شبح بالعكس الانثي فيه بتوصل لنضج كبير جداً وبتفهمي وبتحسي بحاجات ف الحياة مكونتيش تعرفي عنها حاجة وبيكون عندك خبرة اكتر ف التعامل مع المجتمع المحيط و مع كل المواقف وافتكري دايماً ان الجواز مش سن معين ده شخص معين ومش جواز والسلام لان ببساطة لو جواز والسلام كنتي اتجوزتي من ايام الثانوية.. وافتكري ان احساس الندم ع جواز غير مناسب قاسي جداً وأوقات أصلا مبينفعش فيها الندم فكري ان دي مرحلة وظروف بتمر بيها كل بنت ف حياتها ومش كارثة ولا مصيبة خالص ونصيبك مكتوب لك ف كتابك وجي لحد عندك ….

22 – قربي من الناس الحقيقة اللي بتحبك بجد وابعدي عن محدثي النعمة والnouveau riche وال fake personalities و ال showing off..

23- عشان تعرفي معني كلمة مسئولية سافري لوحدك او مع أصحابك البنات هتفرق اوي ف حياتك لما تكوني مسئولة تماماً عن نفسك في بلد متعرفيش فيها حد الحذر هيكون اكتر و ميولك للنظام والانضباط ف المواعيد هيكون ادق بكتير جداً

24- اهتمي ببشرتك تاني و تالت ومليون كلي خضروات وفواكه كتير اتمشي شدي جسمك … ثقي في نفسك الثقة ف النفس اول طريق النجاح و تقدير الذات self esteem بيظهر في حبك لنفسك حبي نفسك اوي ومتسمحيش لحد لزعزعة الثقة دي …

25 – اشتري اللي نفسك فيه اسعدي نفسك كافيء روحك اللي قادرة تقاوم وتعيش وتوصل لأهدافها رغم كل صعوبات الحياة