“وبشتاقلك ” شعر بقلم الشاعر “محمود صابر الخطيب”

بقلم الشاعر/ محمود صابر الخطيب

وبشتاقلك 
ولما الشوق يعاندنى 
اعافر فيه واندهلك 
ويرجعلى صدى صوتى 
بنفس اللحن يندهلك 
انا فى البعد يا غاليه 
بكل الحب مشتاقلك 
وبشتاقلك 
… 
كلامك لسه رنّاته 
فى ليل البعد تطربنى 
وتاخد روحى من روحى 
وعن احزانى تبعدنى 
ولما ارجع لجواباتك 
عشان م اعد فى حروفك 
الاقيكى على بابى
واتسامرمع طيفك 
وارجع تانى بالذكرى 
ليوم ما كنتى بتجينى 
ببسمه حب ما تخلص 
وخصله شعر فوق عينك
يداعبها الهوا تنعس 
واشوف الشوق على جبينك 
دانا فى البعد ياغاليه 
بكل الحب مشتاقلك 
وبشتاقلك
… 
قريب جدا ح اكون جنبك 
واحط ايديّا فى ايديكى 
تضمّينى ..وتاخدينى 
بفستانك تلفينى 
واشوف الفرحه فى عنيكى 
اشاورلك تطاوعينى 
تغطّينى .. تدفينى 
مع قلبك تخلينى 
اعيش العمر اغنيكى 
دانا فى البعد يا غاليه 
بكل الحب مشتقلك 
وبشتاقلك 
…