* طلع النهار * .. شعر بقلم الشاعر / محمود صابر الخطيب
بقلم الشاعر : محمود صابر الخطيب
طلع النهار لابس عبايته العاديه
والشمس من تحت الجبل .. بخيوطها الدهب جيّه
اليوم ربيعى .. وكل شىء باين طبيعى .. والنسايم حقيقيه..
وابتسامه بنت فى العشرين بترمى ضلّها ..
على قلب فى المنجم بيحفر.. من قبل عام بيحبها
وغناوى اطفال المدارس فى الصباح ..
يحلى عليها الدق ع السندان لما عمال المصنع تسمع لحنها
ورغيف نضيف فى السوق ..
وعيون تبص لفوق وتحمد ربها.
وهناك على المدد البعيد ..
طالع حديد من ارضنا وسماد .
وولاد بتغزل قطننا قماشات ..
بدل وشايات ..
وبنات بترسم ع القماش صوره ..
ورده .. سنبله .. عصفوره .
وآلة الفنان تغنى للبنايين ..
ومهندسين الحفارات ايدهم بايد الشغاليين ..
والصيادين فوق الشطوط .. جنب الشباك متحضرين .
وف المسا.. زفه عروسه كويسه ..
والزينه كهربا م السد
متعلقه فوق المساكن والدروب ..
والحب ساكن القلوب .. الحب ساكن القلوب .
…
الشاعر محمود صابر الخطيب