إفاقة “معوض عادل “الملقب بـ«الشهيد الحي» للثورة بعد غيبوبة استمرت 5 سنوات
كتبت : مريم محمود
نشر المحامي مالك عدلي، على حسابه الخاص على موقع التواصل الاجتماعي “فيس بوك“، أنه زار معوض عادل معوض الملقب بـ«الشهيد الحي» في لندن، مؤكدا أنه أفاق من الغيبوبة.
وقال عدلي: “أنا هكتب كلمتين أرجو ما حدش يعتبرهم مزايدة ولا إساءة وأرجو ما حدش يعلق عندي عليهم بس هما للأسف كلمتين لو ما قلتهمش هطق”.
وأضاف عدلي: «معوض في مستشفى تبعد عن لندن ساعة ونص بالعربية.. رحت وأنا مش عارف إيه ممكن أحس بيه أو يحصللي بس دا عيل من عيالنا ولازم هشوفه يعني هشوفه.. مستشفى بسيطة معوض فيها في غرفة بسيطة على جهاز تنفس صناعي وأجهزة تانية.. شاب زي القمر تكوينه الجسماني يشي بأنه صاحب جسم قوي.. أبيضاني وشعره ناعم وعينيه بنية نايم على سرير أبيض مابيتحركش بس بيشوف وبيسمع والنهارده الممرضة حكت لأخوه أنه ضحك لما حاولت تهزر معاه وساعات بيحس لما حد يلمسه.. معوض في غيبوبة من نوفمبر 2011 وبره دنيانا خالص.. عزة ومصطفى وعلي كانوا كرماء وسابوني أدخله لوحدي.. يا ربي معوض بيبصلي ونايم قدامي.. هقوله إيه ؟ إزيك يا معوض أنا اسمي مالك واحد يعرفك وبيحبك وجاي من مصر يطمن عليك.. شد حيلك يا بطل.. فيه ناس كتير بيسلموا عليك.. معوض مركز معايا بعينيه.. ابتديت أقوله أسامي على بالي دايما بيسألوا عنه.. شد حيلك يا معوض إحنا كلنا مستنيينك تقوملنا بالسلامة».